Deilurnar um Þorláksbúð að leysast

Kirkjuráð hefur ákveðið að gera engar athugasemdir við endurbyggingu fornaldarkirkjunnar Þorláksbúðar í Skálholti en staðsetning kirkjunnar hefur verið gagnrýnd. Biskup sat hjá við afgreiðslu málsins.

Málið hefur átt sér langan aðdraganda en síðasta sumar var ráðist í framkvæmdir við að endurhlaða Þorláksbúð kennda við Þorlák biskup helga. Það er Þorláksbúðarfélagið undir forystu Árna Johnsen sem stendur fyrir framkvæmdunum og var það mikið hugðarefni séra Sigurðar heitins Sigurðarsonar fyrrum vígslubiskups í Skálholti. Í sumar kom hins vegar fram gagnrýni á framkvæmdina til dæmis hvað varðar staðsetningu hússins, það er nálægð við Skálholtskirkju en reisa á Þorláksbúð uppvið útvegg kirkjunnar.

Kirkjuráð tók fyrir mál Þorláksbúðar á fundi sínum 21. september síðastliðinn og ákveðið var að málið yrði kannað og framkvæmdum frestað í millitíðinni.

Í könnuninni fólst meðal annars að fara yfir feril málsins og ræða við hlutaðeigandi aðila. Þar á meðal ættingja Harðar Bjarnasonar arkitekts Skálholtskirkju en þeir töldu að höfundarréttur hans á kirkjunni útiloki að reisa megi Þorláksbúð svo nálægt kirkjunni. Kirkjuráð var hins vegar ekki sammála þeim rökum. Þá hefur byggingaleyfi fyrir verið gefið út af hálfu skipulags- og byggingaryfirvalda Bláskógabyggðar. Í ljósi þessarrar könnunar ákvað kirkjuráð að standa ekki í vegi fyrir að Þorláksbúðarfélagið ljúki framkvæmd verksins.

Þá segir í tilkynningu frá Biskupsstofu um málið að Biskup hafi setið hjá við afgreiðslu málsins.