Stormur í aðsigi

Björgunarfélag Akraness var kallað út rétt eftir klukkan þrjú í dag þegar tilkynning barst um að þakplötur væru að fjúka af tveimur íbúðarhúsum í bænum.

Nokkuð hvasst er á Akranesi og nágrenni og fer veður versnandi. Einnig er veður vont undir Hafnarfjalli og á Kjalarnesi þar sem mælst hafa sterkar vindhviður, eða upp undir 40 metrar á sekúndu.

Björgunarsveitin Ægir í Garði er einnig að störfum þessa stundina en þar er þak að losna af gömlu tveggja hæða íbúðarhúsi.

Veðurstofan hefur gefið út stormviðvörun fyrir vesturhelming landsins seinnipartinn í dag og í nótt. Í tilkynningu frá Slysavarnafélaginu Landsbjörg er brýnt fyrir fólki á þessu svæði að ganga vel frá lausum munum við hús og í görðum.