Það fylgir glamúrnum að vera pínu DJARFUR

Fyrirsætan Hildur Líf, 21 árs, sem skoða má í meðfylgjandi myndasafni, vakti athygli þegar hún tók þátt í fyrirsætukeppninni Ungfrú Samúel eða réttara sagt Samkeppninni á síðasta ári þar sem hún lenti í einu af fimm efstu sætunum. Við töluðum stuttlega við Hildi um fyrirsætustörfin, lífið og tilveruna.

„Ég hef setið fyrir í snyrtivöruauglýsingu, bikiníauglýsingum, sportvöruauglýsingum fyrir World Class, nokkrum sinnum setið fyrir í Vikunni og þess háttar blöðum fyrir minni háttar auglýsingar. Ég sat einhvern tímann fyrir fyrir Apple ásamt fleiri skandinavískum stúlkum. Síðan hef ég leikið aukahlutverk í sjónvarpsþáttum, verið sportstúlka hjá Betsson.com og tekið að mér að vera fyrirsæta fyrir naglafræðinga. Ég tók þátt í fyrstu og síðustu módelkeppninni minni, Samkeppnin, sem var í um heilt ár þar sem fóru fram allskonar myndatökur hjá nokkrum ljósmyndurum. Síðan hef ég setið fyrir hjá ýmsum ljósmyndurum frá Íslandi, Ástralíu og Noregi. Ég var einhvern tímann árið 2004 eða 2005 í fermingarauglýsingu á auglýsingarskilti í Smáralind og í Kópavogi og síðan minni háttar myndatökur fyrir hárgreiðslufólk, og verið model fyrir rokkóperu," segir Hildur þegar hún rifjar upp hvað hún hefur tekið að sér í gegnum tíðina þegar kemur að fyrirsætustörfum.

Góð ráð fyrir konur sem hafa áhuga á fyrirsætustörfum? „Mín ráð eru þau að taka alls ekki öllu sem býðst, þá sérstaklega helst að taka almennileg verkefni sem eru „fancy" og vera ákveðin og standa alltaf á sínu ef þær vilja ekki gera eitthvað þá frekar sleppa þeim verkefnum heldur en að ana út í þau út af þrýstingi," segir Hildur og heldur áfram: „Fara vel með sig, huga vel að húð, líkama og sál. Stunda líkamsrækt, drekka nóg vatn og líða vel með líkama sinn og alls ekki rakka sjálfa sig niður og bara endilega finna sér fína modelskrifstofu og senda inn myndir af sér eða einhvern umboðsmann ef þess er þörf."

Áhugamálin þín? „Ég hef mikinn áhuga á bílum, íþróttum, snjóbrettum, krossurum, fjórhjólum, jet ski og alls konar strákasporti eða það sem drífur adrenalínið áfram," svarar hún brosandi.

„Ég hef líka áhuga á kaffi, hef til dæmis farið á kaffinámskeið, póker, förðun og glamúr og ég elska að sanka að mér sem flestum upplýsingum og læra meira um það sem ég hef áhuga á, segir hún og bætir við: Ég er pínu „keppnis" en ég á að baki 11 ára handboltaferil og hef enn áhuga á því. Ég fylgist mikið með handboltanum þó ég sé hætt vegna meiðsla. Handboltinn bara kemst ekki mikið að í dag hjá mér."

Þegar við spyrjum Hildi út í bikinímyndatökurnar svarar hún: „Það fylgir glamúrnum að vera pínu djarfur en það er alveg hægt að hafa hlutina djarfa án þess að það sé subbulegt. Mér hefur alltaf fundist gaman að skoða auglýsingabæklinga með fallegum myndum af fallegum líkömum. Mér finnst líka falleg nekt í góðu lagi og fer oftast bara eftir hvort það sé ekki örugglega „fancy not trashy". Mér finnst lítið mál að sitja fyrir sjálf á bikiní því ég er ánægð með líkama minn og geri líka í því að halda honum við. Ef fólk er ekki sátt við það þá þarf það ekkert að glápa. Það skiptir auðvitað bara öllu ef þú sjálf ert sátt við hlutina og hefur gaman af þeim. Ég hef allavega ekki gert neitt ennþá sem ég sé eftir enda hef ég heldur ekki verið að taka öllu sem býðst. Ég er frekar „old school" og settleg að eðlisfari."

„Vera hjartahlý og samkvæm sjálfri mér. Svo á ég mér eina mottó-línu sem ég held upp á: Don't give other people a piece of your mind unless you can afford it," segir Hildur spurð um lífsmottóið hennar.

Framtíðarplönin þín? „Gera neglur til gamans, farða, þjálfa hunda, eiga mitt eigið fyrirtæki sem er í vinnslu og verður áfram í einhvern tíma ásamt bestu og yndislega hæfileikaríku vinkonu minni en það er leyndó eins og er, vera áfram ákveðin og sjálfstæð forever young and happy," svarar hún áður en kvatt er.

Í meðfylgjandi myndasafni má sjá fyrirsætumyndir af Hildi.