Dregur úr klamydíutilfellum

Tæplega sextánhundruð manns greindust með klamydíu fyrstu níu mánuði þessa árs. Fjöldi tilfella á þessu ári hefur dregist saman um tæp tíu prósent miðað við sambærilegt tímabil í fyrra. Þetta kemur fram í Farsóttafréttum Landlæknisembættisins. Alls greindust 1584 einstaklingar með klamydíu, þar af var 941 kona og 609 karlar en upplýsingar um kyn vantar fyrir 34 einstaklinga að því er fram kemur.

Ef litið er á aldursdreifingu smita á síðustu fjórum árum kemur í ljós að konur sýkjast fyrr en karlar, en vitað er að stelpur eru yngri en strákar þegar þær byrja að stunda kynlíf.

Fyrri rannsóknir benda til að bein tengsl séu á milli fjölda sýna sem tekin eru á hverjum tíma og fjölda tilfella sem greinast. Í Farsóttafréttum segir að enginn munur sé fjölda sýna fyrstu níu mánuði þessa árs borið saman við sama tímabil í fyrra, „sem bendir til að fækkun tilfella stafi af minnkandi klamydíusmiti í samfélaginu.“