Isavia biður Túrista.is afsökunar

Isavia, sem annast rekstur og uppbyggingu allra flugvalla og lendingarstaða á Íslandi, hefur beðist velvirðingar á því að upplýsingagjöf til vefsíðunnar Túrista.is vegna vinnslu fréttar um öryggisleit í Leifsstöð hafi verið með þeim hætti að misskilnings gæti gætt.

Túristi.is fjallaði í sumar um að biðtími við öryggisleitina á Keflavíkurflugvelli væri allt að þrefallt lengri en á flugvellinum í Kaupmannahöfn. Vísir fjallaði síðan um málið og vitnaði í Túrista.is. Isavia brást þá við með því að senda Vísi yfirlýsingu þar sem því var haldið fram að engar rannsóknir hafi verið gerðar á biðtímum við öryggishliðin. Þetta kom aðstandendum Túrista.is í opna skjöldu enda hafði hann byggt sína frétt á upplýsingum frá upplýsingafulltrúa Isavia. Kristján Sigurjónsson, sá sem stendur að Túristi.is fór fram á leiðréttingu á þessu frá Isavia og nú hefur stofnunin brugðist við því.

Yfirlýsingin frá Isavia fer hér að neðan í heild sinni:

„Isavia ohf. hefur með bréfi til ferðavefjarins Túristi.is 18. október s.l. beðist velvirðingar á því að upplýsingagjöf til Túrista.is vegna vinnslu fréttar um strangt eftirlit í öryggisleit með skóbúnaði flugfarþega í Flugstöð Leifs Eiríkssonar á Keflavíkurflugvelli sem birtist á Túristi.is 12. ágúst s.l., og Vísir.is  fjallaði um sama dag, hafi verið með þeim hætti að til misskilnings gæti leitt."