Meintur höfuðpaur stöðvaður í Bandaríkjunum fyrr í mánuðinum

Rúmlega fertugur karlmaður sem talinn er vera höfuðpaur í stóra fíkniefnamálinu sem fréttastofan sagði frá í gær var stöðvaður við landamæraeftirlit í Bandaríkjunum fyrr í mánuðinum.

Hann hlaut dóm fyrir fíkniefnamisferli í júní á þessu ári. Annar maður sem situr í gæsluvarðhaldi segist hafa verið svikinn í málinu.

Málið snýst um sendingu sem kom með gámaskipi frá Hollandi en í henni var að finna tugi kíló af fíkniefnum, kókaín, amfetamín, e-töflur og stera.

Í kjölfarið var starfsmaður heildsölufyrirtækis á höfuðborgarsvæðinu handtekinn og úrskurðaður í gæsluvarðhald.

Lögregla beið átekta og á laugardag var annar karlmaður, sem talinn er vera höfuðpaur í málinu, handtekinn á Keflavíkurflugvelli og úrskurðaður í gæsluvarðhald til 11.nóvember.

Sá aðili hefur alloft komið við sögu lögreglu hér á landi. Meðal annars var hann viðriðinn stóra fíkniefnamálið á sínum tíma en hann hlaut dóm fyrir fíkniefnamisferli í júní á þessu ári..

Athygli vekur hinsvegar að þann 5.október, nokkrum dögum áður en lögreglan lét til skarar skríðar, var hann stöðvaður við Landamæraeftirlit á Flórída og var ekki hleypt inn í landið.

Samkvæmt heimildum fréttastofu ætlaði hann að spila þar golf, en fór þess í stað til Spánar. Þaðan var hann að koma þegar hann var stöðvaður nú um helgina.

Meintur höfuðpaur er búsettur hér á landi, og eftir því sem fréttastofa kemst næst eru hann og sá sem handtekinn var fyrr í mánuðinum kunningjar.

Sá aðili sem er á sextugsaldri hefur aldrei komið við sögu lögreglu áður. Heimildir fréttastofu herma að hann telji sig hafa verið svikinn í málinu.

Hann hafi einungis verið beðinn um að koma pakka sem innihéldi stera hingað til lands. Og hafi því ekki haft hugmynd um hið mikla magn fíkniefna.

Hann hafi tekið á móti pakkanum í Hollandi og komið honum í hendur þriðja aðila, sem hafi sett hann um borð í gámaflutningaskipið.

Ætlunin hafi síðan verið sú að hann tæki við pakkanum hér á landi.

Til þess kom hinsvegar ekki, þar sem lögregla handtók hann áður, eftir umfangsmiklar símhleranir mánuðum saman.