Eigandi Carter segist víst klippa fatlaða

Fatlaðri konu í hjólastól var neitað um klippingu á hárgreiðslustofu í Hafnarfiði um helgina. Eigandi stofunnar segir fatlaða almennt velkomna. Umrædd kona hafi hins vegar verið í stórum sérsmíðuðum stól sem gerði starfsfólki erfitt um vik.

Þroskaþjálfi á sambýli í Hafnarfirði skrifaði um málið á Facebook í gærkvöldi og vakti það strax mikla athygli. „Ég varð orðlaus þegar okkur var vísað út af hárgreiðslustofunni vegna þess að konan var í hjólastól og starfsfólkið fengi verk í bakið við það að klippa hana, ég hef í ýmsu lent í gegnum tíðina en aldri svona," sagði Hanna Dóra Stefánsdóttir, þroskaþjálfi á Facebook.

Róbert Magnússon, eigandi hárgreiðslustofunnar, finnst umræðan hins vegar vera á villigötum.

„Upphaflega komu kvartanir meðal starfsmanna að þetta sé mjög erfitt verkefni. Stóllinn sé svolítið stór og fyrir. Þannig ég bað um, og hafði samband deginum á undan, hvort að það væri ekki hægt að „svissa" um stól til þess að það sé léttara að klippa hana af því notabene því við höfum klippt hana áður og vitum hversu erfitt það er. Svörin voru engin og svo mæta þau á svæðið og ég vildi helst færa hana um stól en það var ekki hægt. Til þess að vernda mitt starfsfólk, ég vil náttúrlega hafa það á heilu og höldnu, og þetta kemur blessaðri konunni ekkert við, hún er sárasaklaus, þá varð ég að neita," segir Róbert.

Netheimar hafa logað í dag vegna málsins og meðal annars hefur fólk lýst andúð á yfirlýsingu sem sögð er frá Róberti þar sem segir að stofan afgreiði ekki fatlað fólk. Róbert segist hins vegar ekki hafa skrifað hana og bendir á að fjöldi viðskiptavina hans séu fatlaðir.

„Venjulegur hjólastóll, eins og er búið að vera sýna á netinu, þá skal ég glaðlegur klippa hana í beinni útsendingu," segir hann að lokum.