Nöfn systranna sem létust á Spáni

Konurnar sem fórust í bílslysinu á Alicante í gær hétu Erla Tryggvadóttir, f. 1929 og Svana Tryggvadóttir, f.1931. Þær voru systur.

Systurnar lentu í hörðum árekstri við rútu skammt frá flugvellinum á Alicante á Spáni í gærkvöldi.

Í rútunni voru 43 háskólanemar og slösuðust nítján þeirra, þar af fimm alvarlega.

Áreksturinn var svo harður að rútan valt á hliðina, en að öðru leyti eru tildrög slyssins óljós samkvæmt spænskum fjölmiðlum. Ræðismaður Íslands á Benidorm annast málið ytra, fyrir hönd utanríkisráðuneytisins.