Rannsakað hvort yfirmaður hafi hvatt til ólöglegs innaksturs

Lögreglan rannsakar nú hvort vinnureglur og jafnvel fyrirmæli yfirmanna fyrirtækis, sem staðsett er á Dalvegi, hafi gert ráð fyrir innakstri á stað þar sem innakstur er bannaður. Þetta er verið að rannsaka vegna þess að hjólreiðamaður slasaðist mjög alvarlega þegar hann varð fyrir og lenti undir gámabíl sem beygt var í veg fyrir hjólreiðamanninn á þessum stað í síðustu viku.

Á fésbókarsíðu lögreglunnar segir að bæði ökumaður bifreiðar og reiðhjóls hafi verið á leið vestur Dalveg. Á fyrirhugaðri akstursleið ökumanns er innakstursbann. Rannsókn lögreglu beinist meðal annars að meintu broti ökumanns bifreiðarinnar á umferðarlögum með því að aka í veg fyrir umferð gangandi og hjólandi með því að aka gegn innakstursbanni og broti á hegningarlögum með því að valda öðrum tjóni á líkama eða heilbrigði með gáleysi. Þá segir lögreglan að rannsóknin lúti jafnframt að aðstæðum á vettvangi. Meðal annars hvernig staðið var að ákvörðun um bann við innakstri á þessum stað og hvort innakstur hafi verið auðveldaður ökumönnum á leið vestur Dalveg með breytingum á umferðamannvirkjum.

Rannsakað verður jafnframt hvort vinnureglur og jafnvel fyrirmæli yfirmanna fyrirtækis sem þarna er með aðstöðu, hafi gert ráð fyrir innakstri á nefndum stað. Í öllum tilvikum verður kannað hvort um refsiábyrgð geti verið að ræða.