Söfnuðu rúmlega þremur milljónum á Herminator

Rúmar þrjár milljónir króna söfnuðust á þriðja árlega Herminator góðgerðargolfmótinu í sumar. Það er íslenski landsliðsfyrirliðinn Hermann Hreiðarsson sem stendur fyrir mótinu. Ágóði af mótinu hefur verið notaður til að styrkja góð málefni og í ár fengu sex góðgerðarfélög afhentar ávísanir að upphæð 300 til 800 þúsund krónur.

Herminator golfmótið hefur verið haldið árlega undanfarin þrjú ár en það er íslenski landsliðsfyrirliðinn Hermann Hreiðarsson sem stendur fyrir mótinu. Ágóði af mótinu hefur undanfarin ár verið notaður til að styrkja góð málefni og í ár var engin breyting þar á. Þrjár komma þrjár milljónir króna söfnuðust á mótinu í ár sem er hálfri milljón meira en í fyrra og í dag fengu sex góðgerðarfélög afhentar ávísanir að upphæð þrjúhundruð til áttahundruð þúsund krónur.

Ásgeir Johansen einn aðstandenda mótsins segir mótið vera dæmi um „góðhjartaða vitleysinga“ sem vilja láta gott af sér leiða.