Samningur við Rússa um orkumál

Katrín Júlíusdóttir iðnaðarráðherra og Sergey Shmatko, orkuráðherra Rússlands, undirrituðu í morgun samstarfssamning milli Íslands og Rússlands um jarðhitamál.

Markmiðið með samningnum er að auka rannsókna- og vísindasamstarf ríkjanna á sviði jarðhita, samkvæmt tilkynningu frá iðnaðarráðuneytinu. Einnig að efla tengsl fyrirtækja sem vinna að nýtingu jarðhita.

Á morgun mun Katrín undirrita samstarfssamning milli ríkjanna um ferðamál og í tengslum við hann munu fulltrúar nokkurra íslenskra ferðaþjónustufyrirtækja kynna starfsemi sína fyrir rússneskum ferðaskrifstofum.