Strákar nota Netið meira til upplýsingaöflunar en stelpur

Fimmtán ára gamlir strákar nota tölvu mun meira til upplýsingaöflunar en stelpur, samkvæmt niðurstöðum rannsóknar sem gerð var til að meta tölvu og netnotkun og til að meta færni nemenda við að vinna með og meta upplýsingar á netsíðum.

„Við spyrjum hvað þau gera á Netinu og þau svara hversu oft þau nota Netið til að skoða fréttir, til að fræðast um eitthvað efni, til að nota Wikipedia og fleira í þeim dúr. Svo spyrjum við líka hvort þau noti email, tjatt og spjallrásir," segir Almar Halldórsson hjá Námsmatsstofnun. Þarna sé mjög skýr kynjamunur. Strákar noti Netið mun meira til upplýsingaöflunar, en bæði kynin noti Netið jafnmikið sem samskiptaleið.

Auk fyrrnefndar þátta var kannað hversu góður lesskilningur barnanna var á nettexta miðað við texta sem var á pappír. „Krakkar í dag þekkja mjög vel nettexta og framsetningu á nettexta. Hann er oft styttri og í meiri stikkorðastíl en á pappír en það bendir ekkert til þess að íslenskir nemendur séu færari með þennan texta en þegar hann er á pappír," segir Almar.

Rannsóknin er hluti af PISA rannsókninni sem gerð var 2009. Ísland tók þátt í henni ásamt 18 öðrum PISA ríkjum. Almar mun kynna rannsóknina á fyrirlestri í Háskóla Íslands í Stakkahlíð klukkan tólf í dag.