Eldingaveður á Suður- og Vesturlandi

Nokkuð mikið hefur verið um eldingar á landinu í kvöld og fregnir hafa borist af rafmagnsleysi á suðvesturlandi. Haraldur Eiríksson, veðurfræðingur á Veðurstofu Íslands segist ekki geta staðfest að tenging sé á milli rafmagnsleysisins og veðurfarsins, en eldingarnar kynnu að halda áfram frameftir kvöldi.

„Við höfum fengið fréttir af eldingum á suðurlandi og ofan af Hellisheiði. Þær hafa helst verið að mælast á Suðvesturlandi en þó einhverjar líka vestur á Snæfellsnesi."

Haraldur segir þetta ekki óvenjulega eldingavirkni, nú sé óstöðugt skúraloft að ganga yfir landið sem valdi eldingunum. „Þetta mesta er nú gengið yfir hérna í Reykjavík og þetta gengur hratt yfir, svo það er kannski einn eða tveir tímar í viðbót þar sem einhversstaðar verða eldingar."