Varar við fordómum gagnvart stjórnmálamönnum

„Grundvallaratriðið í þessu öllu saman er að ef við ætlum að búa til þjóðfélag þar sem pólitíkusar, eða allir sem taka þátt í stjórnmálastarfi eru dæmdir út frá því einu lendum við í verulegum vandræðum,“ sagði Höskuldur Þórhallsson, þingmaður Framsóknarflokksins, vegna háværrar umræðu um ráðningu Páls Magnússonar sem forstjóra Bankasýslu ríkisins.

Höskuldur sagði á að Framsóknarflokkurinn hefði ekki komið að ráðningu Páls. Í samtali við Reykjavík síðdegis á Bylgjunni varaði Höskuldur við of miklum fordómum gagnvart fólki sem hefði tekið þátt í pólitík „Við lendum í þeim vanda að gott fólk vill ekki taka sæti á Alþingi og Alþingi þarf svo sannarlega á því að halda að þangað vilji koma gott fólk, hæft, vel menntað, með reynslu úr samfélaginu, sem er til í að taka þátt í hinni málefnalegu umræðu,“ sagði Höskuldur.

Hann sagði að bloggarar og fjölmiðlar stýrðu of mikið ómálefnalegri umræðu sem Alþingi mætti ekki taka þátt í. „Þar eiga að vera menn sem setja sig vel inn í mál og kynna sér allar hliðar þess. Ég held að það sé þess vegna sem Alþingi þurfi á góðu og hæfu fólki að halda,“ sagði Höskuldur.