Þriggja ára fangelsisdómi snúið við í Hæstarétti

Óðinn Freyr Valgeirsson, sem Héraðsdómur Reykjavíkur dæmdi fyrr á árinu í þriggja ára óskilorðsbundið fangelsi fyrir grófa líkamsárás, var sýknaður af ákærunni í Hæstarétti í dag.

Óðinn var ákærður fyrir að hafa ráðist á sextán ára gamla stúlku á göngustíg í Laugardal í október í fyrra, slegið hana ítrekað með hörðu áhaldi í höfuð og tekið hana hálstaki og þrengt að þar til hún missti meðvitund. Þegar málið var til meðferðar fyrir héraðsdómi hafði einn dómari fjölskipaðs dóms skilað sératkvæði þar sem komist var að þeirri niðurstöðu að sýkna bæri Óðinn.

Hæstiréttur kemst að þeirri niðurstöðu að ágallar á skýrslutökum lögreglu af systur Óðins væru þess eðlis að ekki væri hægt að líta til skýrslnanna við úrlausn málsins. Hún hafði hvorki verið upplýst með fullnægjandi hætti um réttarstöðu sína sem vitnis né um það hverjir myndu fá aðgang að upptökum af skýrslutökunum. Einnig var fundið að því að ekki hefði farið fram rannsókn á erfðaefni á blóðsýnum sem tekin voru á vettvangi árásarinnar, myndir af áverkum stelpunnar hefðu ekki verið í gögnum málsins og að skort hefði greinargóðar lýsingar á hæð og útliti Óðins og árásarþolans.

Óðinn hafði sjálfur játað fyrir lögreglu að hafa framið þann verknað sem hann var ákærður fyrir. Fyrir héraðsdómi bar Óðinn aftur á móti að hann hefði ranglega játað á sig sök við umrædda skýrslutöku. Skýrsla Óðins hjá lögreglu þótti hafa verið óljós og ruglingsleg og ekki nema að hluta í samræmi við annað sem fyrir lá í málinu. Því varð sakfelling ekki reist á henni einni sér. Þrátt fyrir að framburður vitna kynni að styðja að Óðinn hefði ráðist að þolandann nægði sá framburður einn og sér ekki til sakfellis gegn eindreginni neitun Óðins fyrir dómi. Hann var því sýknaður af ákærunni.