Tökur á Heimsendi hefjast í júní

Tökur á nýjum framhaldsþáttum í leikstjórn Ragnars Bragasonar, Heimsendi, hefjast í byrjun júní og standa fram á verslunarmannahelgi. Að því tilefni hafa aðstandendur þáttanna ákveðið að auglýsa eftir aukaleikurum í þættina.

„Sögusviðið er þessi afskekkta geðdeild og það er náttúrlega þarna mikið af fólki, bæði vistmenn og starfsfólk. Þannig að ég er bara að leita að því sem ég kalla bakgrunnsleikara, eða fólki sem er þarna allan tímann. Þetta er svona aðeins meira en það sem kallast að vera statisti, þar sem fólk birtist í einhverjum hóp. Þetta er fólk í kjarna af vistmönnum sem eru þarna á þessum stað," segir Ragnar Bragason í samtali við Vísi.

Tökur á þáttunum fara fram á Arnarholti á Kjalarnesi. „Þar stendur tómt húsnæði og beið eftir okkur," segir Ragnar. Bæði inni- og útitökurnar verða þar. „Þetta er ein verslunarmannahelgi á Arnarholti," segir Ragnar, en heimilið muni þó heita Heimsendi og þannig sé nafn þáttanna, Heimsendir, komið til.

Gert er ráð fyrir að fyrstu þáttur í þáttaröðinni verði frumsýndur í október. Með aðalhlutverk í þáttunum fara Pétur Jóhann Sigfússon, Jörundur Ragnarsson, Halldór Gylfason, Sigurður Sigurjónsson, Nína Dögg Filippusdóttir, Karl Ágúst Úlfsson, Brynhildur Guðjónsdóttir og Halldóra Geirharðsdóttir.

Ragnar segir að verið sé að leita að aukaleikurum sem eru komnir á miðjan aldur og eldri. Þeir sem hafa áhuga er bent á að senda tölvupóst á aukaleikarar@sagafilm.is.