Víðtæk verkföll gætu verið framundan

Víðtæk verkföll gætu skollið á innan tveggja til þriggja vikna ef óvæntur kraftur færist ekki í kjaraviðræður. Nokkur stór verkalýðsfélög hafa vísað málum sínum til Ríkissáttasemjara sem er undanfari þess að boðað verði til vinnustöðvunar.

Óhætt er að fullyrða að staðan á vinnumarkaði hafi ekki verið eins alvarleg og nú í mörg ár. Kjaraviðræður á almennum markaði eru komnar í algeran hnút og litlar líkur á að Samtök atvinnulífsins og Alþýðusambandið nái saman.

Stærsta hindrun í vegi kjarasamninga er krafa Samtaka atvinnulífsins um að samningar náist við stjórnvöld um útfærslu á breytingum á lögum um stjórn fiskveiða. Verkalýðsforystan hefur lýst því yfir að það sé algerlega ólíðandi að blanda þessum tveimur málum saman, en atvinnurekendur segja ekki hægt að semja um launahækkanir á meðan framtíð sjávarútvegsins séu í óvissu.

Starfsgreinasambandið, Flóabandalagið, Verslunarmannafélag Reykjavíkur og Landsamband verslunarmanna hafa öll ásamt félögum flugvirkja og flugumferðarstjóra vísað deilum sínum til Ríkissáttasemjara. Það er forsenda þess að félögin geti kallað saman félagsfundi til að fá heimild til verkfalls.

Verkföll geta hafist sjö dögum frá samþykkt félagsfundar á aðgerðum, en í millitíðinni ber ríkissáttasemjara að reyna allt til að forða vinnustöðvun. Ef slíkir félagsfundir og atkvæðagreiðslur fara fram á næstu dögum, gætu verkföll því hafist innan tíu daga til hálfs mánaðar.

Björn Snæbjörnsson formaður Starfsgreinasambandsins segir að gripið verði til verkfallsvopnsins ef á þurfi að halda. En aðgerðarhópur sambandsins kemur saman í dag til að ræða framhaldið. Þá hefur Gylfi Arnbjörnsson forseti Alþýðusambandsins sagt að ef ekki náist samningar, hljóti verkalýðshreyfingin að grípa til vinnustöðvana.