Íþróttafélögin vilja meiri pening frá ríki og borg

Ríkisvaldið ætti að greiða þeim sem líklegir eru til að komast á Ólympíuleikana í London á næsta ári því sem nemur fullum listamannalaunum. Þetta er í það minnsta skoðun Íþróttabandalags Reykjavíkur sem lauk 45. þingi sínu í kvöld. Á þinginu var skorað á ríkisvaldið að hefja slíkan stuðning við íþróttafólk. Þá var einnig skorað á ríkisvaldið að framkvæma sem fyrst könnun á hagrænum áhrifum íþrótta.

Á þinginu var jafnframt samþykkt áskorun til borgaryfirvalda um að endurnýja samstarfssamninga við íþróttafélögin og ÍBR. Í áskoruninni kom fram að nauðsynlegt væri að tryggja rekstrargrundvöll félaganna svo þjónustunni við allan þann mikla fjölda iðkenda sem stunda íþróttir á þeirra vegum væri ekki stefnt í voða. Þá var skorað á borgina að taka án tafar upp styrki til reksturs íþróttaskóla íþróttafélaganna í yngstu bekkjum grunnskóla og stuðning við afreksíþróttir í gegnum Afreks- og styrktarsjóð Reykjavíkur.

Ingvar Sverrisson var einn í framboði til formanns Íþróttabandalagsins á þinginu og því sjálfkjörinn til áframhaldandi formennsku. Í stjórn voru kosin þau Björn Björgvinsson, sem kemur nýr inní stjórn, Gígja Gunnarsdóttir, Lilja Sigurðardóttir, Viggó H. Viggósson, Þórdís Gísladóttir og Örn Andrésson. Í varastjórn voru kjörnar þær Guðrún Ósk Jakobsdóttir og Bjarnveig Guðjónsdóttir, en Bjarnveig kemur ný inní stjórn ÍBR.