Grunur um samráð gosdrykkjaframleiðenda

Grunur um samráð keppinauta leiddi til þess að Samkeppniseftirlitið framkvæmdi í dag húsleit hjá Vífilfelli og Ölgerð Egils Skallagrímssonar. Þetta kemur fram í fréttatilkynningu frá Samkeppniseftirltiinu.

Í tilkynningu sem Ölgerðin birti á vefsíðu sinni í dag kom fram að aðgerð Samkeppniseftirlitsins hafi tekið skamman tíma og ekkert hafi verið látið uppi um ástæður hennar.

Hið sama sagði Guðjón Guðmundsson, framkvæmdastjóri markaðs- og sölusviðs hjá Vífilfelli, í samtali við Vísi. Menn frá Samkeppniseftirlitinu hafi einfaldlega komið á skrifstofuna og fengið að afrita gögn. „Hérna teljum við okkur ekki hafa neitt að fela hvað slikt varðar," segir Guðjón í samtali við Vísi.

Vísir hefur reynt að ná tali af forstjóra Samkeppniseftirltisins í dag, án árangurs.