Spákonur í beinni

„Sigríður Klingenberg og Guðrún Hjörleifsdóttir miðill verða hjá okkur í þættinum í kvöld. Svo tölum við við forseta Sálarrannsóknarfélagsins og Fjólu Jensdóttur stjörnuspeking," svarar Björk Eiðsdóttir annar þáttastjórnandi Dyngjunnar sem er sýndur á Skjá einum á þriðjudagskvöldum klukkan 21:05 spurð út í umræðuefni kvöldsins.

„Okkur langar að vita hvað er til í þessu og hvernig þær fara að þessu, hvernig miðlar sjá framtíðina og fleira í þeim dúr. Hafa ekki flestar stelpur og konur farið til miðils eða spákonu? Þá ekki síst þegar þær hætta með kærastanum," segir Björk og heldur áfram:

„Við ætlum að spyrja hvað má ekki segja og hvort það sé ekki hættulegt að við förum að lifa eftir þessu."

Verður spáð í beinni útsendingu í kvöld? „Ég ætla að spyrja Guðrúnu hvort hún finni fyrir einhverju í salnum eða í kringum okkur," segir Björk spennt.

Í meðfylgjandi myndskeiði má sjá brot úr þáttunum.