Leikhúsi listamanna boðið til Danmerkur

Leikhús listamanna hefur slegið í gegn með sýningum á tveggja vikna fresti á þriðjudagskvöldum í Þjóðleikhúskjallaranum. Þar hafa fjölmargir listamenn framið gjörninga og skemmt gestum sem flykkst hafa að.

Fjöldi gesta hefur komið fram á þessum skemmtunum, til að mynda útvarpsmaðurinn Heiðar Austmann, sem las úr Opinberunarbókinni í gjörningi Ragnars Kjartanssonar á dögunum.

Nú berast af því fregnir að hópnum hafi verið boðið til Kaupmannahafnar með Leikhús listamanna. Ekkert mun enn vera frágengið en stefnt er að því að hópurinn komi fram nokkrum sinnum á sýningu Kristjáns Ingimarssonar, Fools of the World Unite, í aprílmánuði.

Næstu sýningar Leikhúss listamanna eru þriðjudaginn 29. mars, þriðjudaginn 12. apríl og þriðjudaginn 26. apríl. -hdm