Ástarátthyrningur í Búðardal

Kvikmyndin Kurteist fólk verður frumsýnd í lok marsmánuðar og eru Ólafur Jóhannesson leikstjóri og hans fólk í Poppoli Pictures nú í óðaönn að leggja lokahönd á verkið.

Fyrir nokkrum dögum settu þau stórskemmtilegan þátt í loftið á netinu þar sem skyggnst er á bak við tjöldin við gerð myndarinnar. Þar ber vitanlega einna mest á aðalleikaranum Stefáni Karli en tekið var viðtal við hann í gegnum Skype frá heimili hans í Kaliforníu.

Stefán lýsir því meðal annars hvernig Lárus, sem hann leikur, er leikinn grátt af sveitungum. Hann sé nýtt kjöt í Búðardal og lendir mitt á milli í spillingunni og ástarlífinu í bænum, sem hann segir vera hvorki meira né minna en ástarátthyrning.

Samstarf þeirra Ólafs leikstjóra gekk vel en Stefán er þekktur fyrir að vera orkumikill maður. Hann segir Ólaf hafa verið sitt rítalín og setið ofan á sér eins og á ofvirkum krakka við gerð myndarinnar.

Kíkið á myndina um gerð Kurteiss fólks hér fyrir ofan en þar eru einnig stórskemmtileg viðtöl við Eggert Þorleifsson, Benedikt Erlingsson, Halldóru Geirharðsdóttur og fleiri.