Allt á huldu um tilboðin í Perluna

Enn hafa engar upplýsingar verið gefnar um þau tilboð sem bárust í Perluna eftir að frestur til að skila þeim inn rann út í síðustu viku.

Eins og greint hefur verið frá bárust sex tilboð í bygginguna. Tilboðin eru sögð afar flókin og voru sérfræðingar fengnir til að meta þau, en þeir eru í sambandi við Bjarna Bjarnason, forstjóra Orkuveitunnar, vegna málsins.

Samkvæmt upplýsingum Vísis var málið rætt lauslega á fundi stjórnar Orkuveitu Reykjavíkur sem haldinn var á föstudaginn. Tilboðin voru þó ekki lögð fram á þeim fundi.