Akeem vill kúbversku feðgana aftur heim

„Að flýja land er rosalega mikið," segir Akeem Cujo-Oppong, formaður íslensku Panorama Samtakanna, um ofsóknirnar gagnvart kúbversku feðgunum sem hafa flúið land.

Jón Hilmar Hallgrímsson situr í gæsluvarðhaldi vegna málsins sem kom upp síðustu helgi. Lögreglan hefur sagt að hann sé grunaður um kynþáttahatur, ofsóknir og skemmdarverk á heimili feðganna.

Akeem segir málið koma sér á óvart. Hann segist ekki kannast við annað eins dæmi hér á landi en áréttar að samtökin hafi þó oft þurft að berjast við fordóma í ýmsum birtingamyndum.

„Nú ætlum við að leggja áherslu á gönguna frá Hallgrímskirkju á laugardaginn," segir Akeem en RÚV greindi frá því í kvöld að Besti flokkurinn hefði efnt til stuðningsgöngu við feðganna á laugardaginn næsta.

Gengið verður frá Hallgrímskirkju klukkan tvö niður á Ingólfstorg þar sem tónleikar verða haldnir gegn fordómum á Íslandi. Aðspurður hvort stuðningur borgarstjórnar sé mikilvægur fyrir málefnið segir Akeem svo vera.

Akeem vill ennfremur að stjórnvöld leggi áherslu á að fá feðgana aftur heim.

„Ég, sem formaður samtakanna, vil leggja til að yfirvöld beiti sér fyrir því að fá feðgana aftur heim," segir Akeem sem skorar á dómsmálaráðherra til þess að greiða fyrir heimkomu þeirra.

Aðspurður segir Akeem að það séu fordómar á Íslandi. Akeem telur þá liggja djúpt og fæstir fordómafullir einstaklingar viðri skoðanir sínar opinberlega. Sjálfur segist hann til að mynda aldrei hafa orðið fyrir aðkasti vegna uppruna síns.

Akeem segir Ísland frekar fordómalaust samfélag en eins og með öll önnur lönd leynist kynþáttahatur víða.

Hann tekur sem dæmi að oft hafi einstalingar leitað til samtakanna eftir að þeim hefur verið neitað um vinnur. Oft virðist ástæðan engin önnur en upprunalegt þjóðerni einstaklinganna.

Þá hafi það valdið deilum innan fjölskyldna þegar íslenskar stúlkur eða drengir kynnast maka af öðru þjóðerni. Slíkt leggst oft illa í fjölskyldurnar.

„Íslendingar þurfa að gera sér grein fyrir því að þeir búa í fjölmenningarlegu samfélagi," segir Akeem en samtökin vilja koma á sérstöku námi í grunn- og framhaldsskólum þar sem fjölmenning verði beinlínis kennd til þess að sporna við fordómum.

„Við getum lítið gert varðandi eldra fólk sem er fordómafullt.Við þurfum að einbeita okkur að framtíðinni," segir Akeem sem fylgist grannt með þróun sakamálsins sem viðkemur kúbversku feðgunum.