Ungliðahreyfingar stjórnarflokkanna vilja slíta stjórnmálasambandinu

Ungliðahreyfingar ríkisstjórnarflokkanna hvetja ríkisstjórnina til þess að taka af skarið og slíta stjórnmálasamstarfi við Ísrael tafarlaust vegna árásar Ísraela á skipalest með hjálpargögn á leið til Gaza. Stjórn Ung vinstri grænna samþykkti ályktun þess efnis í gær og þá sendu Ungir jafnarmenn frá sér ályktun um málið í dag.

Ályktun UVG

„Stjórn Ungra vinstri grænna fordæmir árás Ísraelshers á skipalest hjálparsamtaka á leið með matvörur og nauðsynjar til Palestínu í nótt.

Í ljósi linnulausra mannréttindabrota og kúgunar Ísraela gagnvart palestínsku þjóðinni skorar stjórn Ungra vinstri grænna á ríkisstjórn Íslands að slíta stjórnmálasambandi við Ísrael, tafarlaust."

Ályktun UJ

„Ungir jafnaðarmenn harma þá atburði sem áttu sér stað í dag á Miðjarðarhafinu þar sem ísraelski sjóherinn réðst á alþjóðlega skipalest sem var á leið til Gaza með mat, hjálpargögn og önnur nauðsyn fyrir íbúa Gazasvæðisins.

Meirihluti íbúa þessa hernumda svæðis reiða sig á aðstoð alþjóðlegra hjálparsamtaka til þess að halda lífi.

Um borð í skipinu, sem sigldi á alþjóðlegu hafsvæði, voru meðal annars sjálfboðaliðar, evrópskir þingmenn, Nóbelsverðlaunahafi og fleiri einstaklingar frá hinum ýmsu Evrópulöndum. Talið er að 9 manns hafi látist í það minnsta og tugir særst.

Framferði Ísraela hefur víða verið fordæmt og mótmælt í dag og hafa sendiherrar Ísraels víða um heim þurft að svara fyrir árásina.

Ísraelar hafa hins vegar tekið slíkum fordæmingum og mótmælum af léttúð hingað til og ólíklegt þykir að það muni breytast.

Ungir jafnaðarmenn hvetja ríkisstjórn Íslands til þess að taka af skarið og slíta stjórnmálasamstarfi við Ísrael tafarlaust. Nógu lengi hafa Ísraelar komist upp með brot á alþjóðalögum og mannréttindabrotum meðan stjórnvöld heimsins horfa aðgerðarlaus á.

Nú er kominn tími til að stoppa það!"