DV sýknað af kröfu Viggós

Reynir Traustason, ritstjóri DV, Birtíngur útgáfufélag og Benedikt Bóas Hinriksson, fyrrverandi blaðamaður DV, voru sýknuð í meiðyrðamáli í Héraðsdómi Reykjavíkur í morgun. Viggó Valdemar Sigurðsson, fyrrverandi landsliðsþjálfari í handbolta, höfðaði málið gegn þeim og sömuleiðis hjónunum Unni Valdemarsdóttur og Ragnari Kristni Árnasyni sem í viðtali í DV lýstu viðskiptum sínum við Viggó.

Viggó var forsvarsmaður fyrirtækisins Ásvíkur ehf. sem seldi Unni sænskt einingahús sem hún ætlaði að láta reisa á lóð sinni. Hjónin vændu Viggó um svik í viðskiptum sínum. Dæmi um ummæli sem Viggó vildi fá ómerkt er: „Hann er búinn að svíkja samninga, ljúga og vera með dónaskap. Hóta okkur símleiðis, hvort sem er í símtölum eða með sms-i. Og með tölvupósti og nú síðast stal hann af okkur."

Viggó taldi að í greininni væru aðdróttanir og ærumeiðandi ummæli og krafðist því 15 milljóna í bætur. Einnig taldi hann að brotið hefði verið gegn reglum um friðhelgi einkalífs hans. Dómari féllst ekki á það og standa öll ummælin sem stefnt var vegna.

Gunnar Ingi Jóhannsson, lögmaður blaðamanna, ritstjóra og útgáfufélags, segir niðurstöðuna afar skynsamlega. „Rökstuðningur dómsins samræmist vel nútíma hugmyndum um tjáningafrelsi og hlutverk fjölmiðla," segir hann.

Blaðamenn hafa verið fundnir sekir um meiðyrði í fjölda mála á undanförnum misserum en Gunnar Ingi segir þetta mál þó ekki öðruvísi að upplagi en fyrri málin. „Maður hefur verið með óbragð í munninum vegna þessara dóma sem hafa verið að falla," segir Gunnar Ingi og telur það mikil gleðitíðindi fyrir íslenska fjölmiðla ef þessi dómur er í takt við það sem vænta má í framtíðinni.

Viggó var dæmdur til að greiða málskostnað stefndu, samtals 750 þúsund krónur. Hann hefur þrjá mánuði til að ákveða hvort hann áfrýjar málinu til Hæstaréttar.