Starfsmenn Gæslunnar fræddir um Senegal

Starfsmenn Landhelgisgæslunnar sem héldu til Afríkuríksins Senegals um síðustu helgi fengu áður færðslu um landið. Fram í október mun TF-SIF, flugvél Gæslunnar flaug sinna landamæraeftirliti fyrir Frontex, landamærastofnun Evrópusambandsins. Varðskipið Ægir hefur sinnt sama verkefni frá byrjun maí.

TF-SIF kom til landsins um miðjan ágúst en í sumar sinnti áhöfn flugvélarinnar mengunareftirliti á Mexíkóflóa fyrir bandarísku strandgæsluna.

Áhöfnin fékk fyrir brottför fræðslu um menningu Senegals, siði og fleira. Fræðslan var í umsjón Lilju D. Kolbeinsdóttur, kennara og MA í þróunarfræði, sem hefur starfað í um tíu ár í Afríku. Starfsmennirnir voru afar ánægðir með kynninguna sem gerði þá enn betur undirbúna fyrir dvölina í Sengegal, að því er fram kemur á vef Landhelgisgæslunnar. Þá sagði Marvin Ingólfsson, stýrimaður og sprengjusérfræðingur, starfsmönnum flugdeildar frá reynslu sinni og annarra varðskipsmanna af veru þeirra í Senegal.

Ægir við eftirlit í Miðjarðarhafi



Fyrst var varðskipið Ægir við strendur Senegal en í júlí var skipinu siglt til Almería á Spáni en þaðan sinnir varðskipið eftirliti á Miðjarðarhafi fram til loka septembermánaðar.