Unglingar eru gersemar

Órói er fyrsta kvikmynd Baldvins Z í fullri lengd. Reynsla hans af starfi með erfiðum unglingum á Akureyri kom að góðum notum við gerð myndarinnar.

Kvikmyndin Órói í leikstjórn Baldvins Z verður frumsýnd á morgun á vegum Kvikmyndafélags Íslands. Hún er byggð á unglingabókum Ingibjargar Reynisdóttur, Strákarnir með strípurnar og Rótleysi, rokk og rómantík, sem hafa notið mikilla vinsælda. Ingibjörg er einmitt handritshöfundur Óróa ásamt Baldvini og fer einnig með hlutverk í myndinni.

„Ég er mjög sáttur,“ segir Baldvin, sem hafði nýlokið við að grandskoða myndina í síðasta skiptið fyrir frumsýningu þegar blaðamaður ræddi við hann. Þetta er fyrsta mynd Baldvins í fullri lengd en hann hefur áður leikstýrt auglýsingum og stuttmyndum ásamt myndböndum við Eurovision-lög Eurobandsins og Jóhönnu Guðrúnar. „Þetta var ótrúlega erfitt en ótrúlega skemmtilegt,“ segir hann um tökurnar. „Ég er búinn að leggja allt mitt í þetta og nú á bara heimurinn eftir að dæma.“

Tökur á Óróa stóðu yfir í fimm vikur og fóru fram fyrir ári í Reykjavík og í bænum Taunton í Englandi. Eitt atriði var tekið upp á lestarstöð í Taunton þar sem Bítlarnir tóku upp atriði fyrir mynd sína A Hard Day’s Night. Mikið af góðri tónlist hljómar einmitt í Óróa og margir sem eiga lag í myndinni koma fram á Airwaves-hátíðinni í ár. Þar má nefna Agent Fresco, Bloodgroup, Nolo, Ólaf Arnalds, Sykur og Snorra Helgason.

Órói er raunsæ þroskasaga sem fjallar um hinn sextán ára Gabríel, sem í byrjun myndarinnar er í sumarskóla í Bretlandi og kynnist þar Markúsi. Þar gerast ákveðnir hlutir sem leiða til þess að líf hans breytist. Þegar hann kemur til Íslands þarf hann að horfast í augu við þær breytingar. Baldvin segir myndina fjalla um unglingaraunveruleikann og vera alveg jafn skemmtilega fyrir fullorðna og unglinga. Fjallað er um svokölluð unglingavandamál, sem oft á tíðum eru í raun og veru foreldravandamál að hans mati. Hann segir að reynsla hans af starfi sínu með erfiðum unglingum á Akureyri fyrir nokkrum árum hafi nýst sér vel við gerð myndarinnar. „Mér finnst unglingar vera gersemi. Þetta er skemmtilegasti aldurinn í lífi manns. Maður sér ekki fram í tímann, sem gerir það að verkum að lífið er dásamlegt. En það er að sama skapi erfitt því manni finnst hver ákvörðun vera manns síðasta í lífinu.“

Með aðalhlutverk í myndinni fara Atli Óskar Fjalarson, Hreindís Ylva Garðarsdóttir Hólm og Haraldur Ari Stefánsson. „Þessir krakkar sem leika í myndinni eru algjörar hetjur. Það á eftir að koma fólki mjög mikið á óvart hvernig þeir standa sig í þessari mynd,“ segir Baldvin.

freyr@frettabladid.is