Endurvinna tillögu um fóstrun leikvalla

Þorbjörg Helga Vigfúsdóttir, borgarfulltrúi Sjálfstæðisflokksins, segir að tillaga Besta flokksins og Samfylkingarinnar um fóstrun leikvalla sé í besta falli endurvinnsla. Þáverandi meirihluti hafi hafið þessa vinnu fyrir tveimur árum. Þorbjörg segir mikilvægt að fólk sem sé að hefja stjórnmálaferil sinn sé heiðarlegt.

Fulltrúar Samfylkingarinnar og Besta flokksins lögðu fram tillögu í borgarráði fyrir helgi um að bjóða borgarbúum leikvelli til fósturs. Karl Sigurðsson, borgarfulltrúi Besta flokksins og formaður umhverfisráðs, sagði í samtali við fréttastofu að hugmyndin gangi út á að áhugasamir og

borgarbúar geti tekið að sér svæði eins og leikvelli í borginni. Borgarbúar sjái þá um viðhald og endurbætur með aðkomu borgarinnar í formi efniskostnaðar og leiðbeininga. Karl sagði unnið að því í stjórnsýslunni að gera hugmyndina að veruleika, útbúa verklagsreglur og annað slíkt.

Þorbjörg Helga gagnrýnir þessa framsetningu í tölvubréfi til fréttastofu. „Ég sem formaður umhverfis- og samgönguráðs hóf þessa vinnu fyrir 2 árum og átti samstarf við öflugan Vesturbæing um að setja svona verkefni á laggirnar."

Segi rétt frá

Hún segir að helst ætti að eigna Ólafi Mathiesen hugmyndina þar sem hann hafi verið fyrsti borgarbúinn sem tók fyrsta völlinn í fóstur fyrir um ári síðan. Verkefnið sé hluti af stærra verkefni sem heiti Gleym-mér-ei og feli í sér verkefni eins og að fóstra garða, leikvelli og að kaupa og merkja sér bekki.

„Mikilvægast er að mínu mati að menn sem eru að hefja feril sinn sem stjórnmálamenn séu heiðarlegir að þessu leyti og segi að minnsta kosti frá því að verkefnið hafi verið komið af stað - og að tillagan snùist aðeins um að formfesta þær reglur sem nauðsynlega verða að liggja fyrir," segir Þorbjörg Helga.