Óttast yfirtöku innflytjenda í Svíþjóð

Peter Mangs, 38 ára Svíi sem er grunaður um eitt morð og nokkrar skotárásir í Malmö undanfarið ár, óttast að innflytjendur muni yfirtaka sænskt samfélag, er haft eftir föður hans í netútgáfu sænska blaðsins Aftonbladet. Mangs er jafnframt grunaður um morð sem framin voru í nágrenni borgarinnar árið 2003.

Sænsk lögregluyfirvöld gefa takmarkaðar upplýsingar um Mangs sem var handtekinn fyrir viku. Aldur hans hefur verið staðfestur en myndbirtingar fjölmiðla eru harðlega gagnrýndar þar sem lögregla telur þær torvelda rannsókn málsins.

Mangs neitar sök en samkvæmt sænskum fjölmiðlum hefur lögreglu tekist að tengja annað af tveimur skotvopnum sem fundust á heimili hans við árásirnar.

Eins og komið hefur fram eru árásirnar í öllum tilvikum, nema einu, gegn fólki af erlendum uppruna. Þá var ungur Svíi skotinn í bíl sínum. Farþegi í bílnum var af erlendum uppruna. Alls eru fimmtán skotárásir til rannsóknar. Mangs er grunaður um aðild að átta árásum hið minnsta.

Árásirnar hófust í október. Síðan þá hefur verið ráðist á fólk fyrirvaralaust við daglegar athafnir. Eitt fórnarlamb var skotið í gegnum rúðu á líkamsræktarstöð. Aðrir hafa verið skotnir við strætóbiðstöðvar og í bílum sínum. Ráðist hefur verið á fólk við bænastaði múslíma. Í síðasta mánuði flúði árásarmaðurinn á reiðhjóli eftir átök við fórnarlamb sitt; hárgreiðslumann frá Íran.

Morðin árið 2003 eiga margt sammerkt með skotárásunum í Malmö undanfarna mánuði. Mennirnir, sem voru 66 ára og 23 ára, tengdust ekki á neinn hátt og voru skotnir í og við heimili sín. Báðir voru skotnir með 9 millimetra skammbyssu. Hins vegar var eldri maðurinn rændur ólíkt þeim yngri sem fannst með seðlaveski sitt á sér.

Haustið 1991 fór maður að nafni John Ausonius um Stokkhólm og Uppsali og skaut ellefu, myrti einn og særði hina alvarlega. Í fyrstu notaði hann riffil með leysigeislamiði og var kallaður Lasermaðurinn. Fjölmiðlar hafa notað svipaða nafngift vegna árásanna nú, enda svipar þessum tveimur málum mjög saman.

Skotárásirnar hafa haldið íbúum Malmö í heljargreipum á undanförnum mánuðum. Um 290 þúsund manns búa á svæðinu. Einn af hverjum þremur er af erlendum uppruna og er aðskilnaður þjóðarbrota, sem talin eru vera um 170 í borginni, mikill.

svavar@frettabladid.is