Hugmyndir um nýja heilbrigðisstétt

Starfandi heimilislæknum fer fækkandi, meðalaldur starfandi heimilislækna er að hækka og ekki tekst að fylla allar þær námsstöður í heimilislækningum sem standa til boða hér á landi. Skortur á heimilislæknum er sá flöskuháls sem helst tefur uppbyggingu heilsugæslunnar hér á landi.

Þingmenn veltu fyrr í vikunni upp þeim möguleikum að mennta nýja stétt aðstoðarmanna lækna eða auka réttindi hjúkrunarfræðinga til að greina sjúkdóma eða ávísa lyfjum í því skyni að tryggja að heilsugæslan geti veitt sem mesta þjónustu um land allt.

Þingmenn allra flokka virtust sammála um mikilvægi þess að sem flestir sjúklingar leituðu til heilsugæslunnar með vandamál sín áður en sótt væri í dýrari þjónustu hjá sérfræðilæknum eða sjúkrahúsum.

Eygló Harðardóttir, þingmaður Framsóknarflokks, sagði að í Bretlandi og Bandaríkjunum hefðu hjúkrunarfræðingar meiri réttindi en hér á landi til að greina einfalda sjúkdóma og gefa út lyfseðla. Einnig væru þar starfandi sérmenntaðir aðstoðar­menn lækna, sem önnuðust einfalda skoðun og öfluðu upplýsinga frá sjúklingum. Kanna þyrfti ítarlega hvort menntun í þessi störf ætti heima í langtímastefnumörkun fyrir heilsugæsluna á Íslandi.

Ólafur Þór Gunnarsson, varaþingmaður VG og starfandi læknir, sagði að vandinn við það að byggja upp heilsugæsluna hér á landi væri meðal annars fólginn í því að tíu til fjórtán ár tæki að mennta einn heimilislækni. Kanna þyrfti hvað það væri í starfsumhverfi heimilislækna sem ylli því að þær námsstöður sem byðust fylltust ekki.

Ólafur Þór og Þórunn Svein­bjarnardóttir, þingmaður Samfylkingar, lögðu áherslu á mikilvægi langtímastefnumótunar í málum heilsugæslunnar.

Ólafur Þór sagði að hér á landi væru til hjúkrunarfræðingar með sérmenntun sem veittu leyfi til að greina sjúkdóma og gefa út lyfseðla víða erlendis. Skoða mætti möguleika á að nýta krafta þeirra betur.

peturg@frettabladid.is