Fjölsóttur fjölskyldudagur | Myndir

Fjölskyldudagur Ungmennafélags Íslands var haldinn við rætur Miðfells í Hrunamannahreppi í dag. Dagurinn var fjölsóttur en um 300 manns skemmti sér hið besta í blíðskaparveðri og 20 stiga hita.

Dagurinn verður haldinn í því augnamiði að vekja athygli á verkefninu „Hættu að hanga! Komdu að hjóla synda eða ganga" sem og öðrum þeim verkefnum sem UMFÍ hefur fram að færa á sviði almenningsíþrótta nú um stundir.

Skipulögð var dagskrá með skemmtiatriðum fyrir alla fjölskylduna. Meðal þeirra sem komu fram á deginum var Kristmundur vinningshafi söngvakeppni framhaldskólanna, Íþróttaálfurinn og Solla stirða. Þá fluttu Ólafur Ragnar Grímsson,forseti Íslands,og Helga Guðrún Guðjónsdóttir, formaður UMFÍ, stutt ávörp.

Deginum lauk með göngu á Miðfell sem er eitt af tveimur fjöllum sem HSK, Héraðssambandið Skarphéðinn, hefur tilgreint í verkefninu „Fjölskyldan á fjallið." Farið var með póstkassa upp á fjallið og ritaði fólk nafn sitt í gestabókina.