Plastic Ono Band endurreist á Íslandi í haust

Yoko Ono ætlar að kalla saman hljómsveitina Plastic Ono Band í Reykjavík til að minnast 70 ára afmælis John Lennon hinn 9. október næst komandi. Alice Walker, höfundur bókarinnar the Color Purple er ein þeirra sem fær Lennon friðarverðlaunin í ár.

Yoko Ono greinir frá því á heimasíðu sinni í dag að hún muni boða til nokkurra viðburða í Reykjavík á afmælisdegi John Lennon hinn 9. október næst komandi, en þá hefði John Lennon orðið sjötugur.

Að venju mun Yoko afhenda Lennon friðarverðlaunin. Þau eru alla jafna veitt tveimur aðilum sem af hughrekki, eins og segir á heimasíðunni, hafa beitt sér fyrir friði, sannleika og mannréttindum. Þau sem fá Lennon friðarverðlaunin í ár eru kvikmyndagerðarmaðurinn Josh Fox, sem gerði heimildarmyndina Gasland á þessu ári, Barbara Kowalcky, sem stofnaði samtök árið 2001 til að berjast gegn mengun í fæðu sem valdið getur sjúkdómum í börnum, rithöfundurinn Michael Pollan fyrir bækur og greinar um hrein matvæli og skáldið Alice Walker baráttukona gegn kynþáttafordómum, kynjamisrétti og fyrir almennum mannréttindum. En Walker er frægust fyrir bók sína The Color Purple, sem síðar var kvikmynduð með Oprha Winfrey í aðalhlutverki.

Yoko bíður vinum sínum víða að úr heiminum til athafnar í Viðey að kveldi afmælisdags Lennons til að tendra á friðarsúlunni. Þá mun Yoko smala saman fólki í hljómsveitina Plastic Ono Band sem þau hjón stofnuðu árið 1968, eða áður en Bítlarnir liðu undir lok. Mun hljómsveitin halda tónleika í tilefni afmælisins, en það telst til heimsviðburðar í rokkheiminum að sú hljómsveit komi saman á nýjan leik. En nokkrar hljómplötur komu út í lok sjöunda og byrjun áttunda áratugarins undir nafni hljómsveitarinnar.