Fleiri fremja sjálfsvíg en deyja í bílslysum

„Ungmenni gera sér oft ekki grein fyrir endanleikanum sem felst í því að taka eigið líf. Það er alltaf hægt að fá nýtt líf í tölvuleikjum. Við höfum heyrt frá krökkum sem var bjargað á síðustu stundu að þau eru ákaflega þakklát og segjast ekki skilja hvað þau hafi verið að hugsa," segir Salbjörg Bjarnadóttir, verkefnisstjóri Þjóðar gegn þunglyndi.

Kertum fleytt á Tjörninni

Í dag er alþjóðlegur dagur sjálfsvígsforvarna og af því tilefni verður haldin kyrrðarstund í Dómkirkjunni klukkan átta. Að lokinni athöfn í kirkjunni verður gengið niður að Tjörninni þar sem kertum verður fleytt til minningar um þá er fallið hafa frá fyrir eigin hendi. Hver og einn fær kerti til að minnast síns nánasta. Þetta er viðkvæm stund fyrir marga en hefur tekist mjög vel þau tvö ár sem við höfum haldið þetta. Kyrrðarstundin er alls ekki trúarlegs eðlis þó hún sé haldin í kirkju. Þetta er bara fallegur staður og fólki hefur þótt dýrmætt að geta komið þarna saman," segir Salbjörg.

Færri deyja í bílslysum

Þrír til fjórir fremja sjálfsmorð að meðaltali í hverjum mánuði. Yfir árið hafa mest 37 tekið eigið líf hér á landi. „Fleiri falla fyrir eigin hendi en deyja í bílslysum. Samt er mun minna rætt um þetta en bílslysin. Þessi mál hafa verið þögguð niður en við vonumst til að geta opnað umræðuna," segir hún.

Sitja uppi með sektarkennd

Að sögn Salbjargar er sérstaklega mikilvægt að hjálpa aðstandendum þeirra sem hafa framið sjálfsmorð því oft sitja þeir uppi með mikla sektarkennd. „Við erum að reyna að fá fólk til að hugsa um að sá sem tekur eigið líf ber alltaf ábyrgðina. Sjálfsvíg er mikill harmleikur og aðstandendur finna fyrir alls konar erfiðum tilfinningum. Fólk verður að vinna úr þessu. Sumir geta gert það með sínum nánustu en aðrir þurfa að leita sér hjálpar fagaðila. Við viljum vekja athygli á því hvernig fólk getur unnið úr þessari reynslu," segir Salbjörg. Hún bendir á að þeir sem byggja sorgina inni geti sjálfir orðið þunglyndir og því mikilvægt að fólk tali opinskátt um tilfinningar sínar.

Aðstandandi segir frá reynslu sinni

Þetta er í þriðja sinn sem alþjóðadagur sjálfsvígsforvarna er haldinn hér á landi og er kyrrðarstundin í kvöld er á vegum þjóðkirkjunnar, Landlæknisembættisins, geðsviðs Landspítala, Geðhjálpar og Hugarafls.

Elín Ebba Gunnarsdóttir, rithöfundur og aðstandandi, segir þar frá reynslu sinni. Bergþór Böðvarsson, fulltrúi notendaþjónustu geðsviðs Landspítalans, les upp og séra Sigfinnur Þorleifsson flytur hugvekju.