Óvissa ríkir um störf hjá E.C.A

Óvissa er um hversu mörg störf myndu skapast ef hollenska hernaðarfyrirtækið E.C.A fengi að flytja hingað óvopnaðar herþotur til útleigu. Þetta kemur fram í bréfi sem Flugmálastjórn hefur sent samgönguráðherra um málið.

Þar segir að í viðræðum við E.C.A. hafi komið fram að fyrirhugað sé að viðhald herþotnanna muni að talsverðum hluta fara fram í öðru ríki, auk þess sem ólíklegt verði að teljast að íslenskir flugmenn kæmu í upphafi til með að starfa fyrir fyrirtækið.

Í bréfinu segir jafnframt að engin formleg beiðni um skráningu flugvélanna hérlendis hafi borist frá fyrirtækinu til íslenskra yfirvalda. Erfitt að taka afstöðu til allra álitamála á meðan svo sé.

Hins vegar sé ljóst að rétt eins og með önnur borgaraleg loftför yrðu vélarnar á ábyrgð Íslendinga þegar þær væru við æfingar í öðrum löndum, yrðu þær skráðar hérlendis. Því þyrfti að finna leiðir til að koma ábyrgðinni yfir á ríkin þar sem þoturnar væru við æfingar.

Enn fremur kemur fram í bréfinu að ekkert ríki hafi lýst sig reiðubúið að aðstoða við verkefnið enda hafi ekki verið leitað eftir því formlega. - sh