Lauk Drangeyjarsundi á þrjóskunni einni

Formaður Frjálslynda flokksins synti í gær Drangeyjarsundið svokallaða. Hann fékk krampa á miðri leið og segist hafa lokið sundinu á þrjóskunni einni.

Sigurjón Þórðarson, formaður Frjálslynda flokksins og sveitastjórnarfulltrúi í Skagafirði, lagði af stað úr Drangey að landi um klukkan korter í átta í gærkvöldi. Drangeyjarsundið er um 6,5 kílómeter, litlu styttra en sjálft Grettissundið, en Sigurjón synti vegalengdina á rúmum tveim klukkustundum. Hann segir sundið hafa verið þrekraun.

„Já þetta tók verulega á. Ég hélt mjög góðum hraða ríflega helminginn af leiðinni. Síðan fékk ég krampa í fæturnar þannig að seinnipartinn fór ég þetta á mikilli þrjósku," segir Sigurjón.

Sigurjóni leið þó vel þegar fréttastofa náði tali af honum, en hann var fljótur að jafna sig eftir sundið. „Ég fór heitan pott á Reykjaströnd og síðan eftir það var farið á mjög skemmtilegt ball hér á Kaffi Krók."

Sigurjón er mikill sjósundmaður og tekur reglulega spretti í sjónum.