Maður getur ekki sagt nei við William Shakespeare

„Þetta er smá áskorun, núna er maður búinn að lesa verkið og er að fara á fyrsta fund með leikstjóranum,“ segir Högni Egilsson, forsprakki Hjaltalín. Hann hefur fengið það vandasama verk í hendurnar að semja tónlistina við leikverkið Ofviðrið eftir sjálfan William Shakespeare sem Borgarleikhúsið frumsýnir um jólin. Leikstjóri er hinn litháíski Oskaras Korsunovas sem hlotið hefur fjölda verðlauna um allan heim. Með aðalhlutverkin fara þeir Ingvar E. Sigurðsson og Hilmir Snær Guðnason sem hafa ekki gert mikið af því að leika saman á sviði.

Högni segist hlakka mikið til þessa verkefnis en hann samdi tónlist fyrir leikrit í Listaháskóla Íslands sem frumsýnt var um jólin. Vinnan uppi í Borgarleikhúsi verður án nokkurs vafa þó eilítið ný fyrir hann. „Þetta bar nokkuð brátt að en maður getur ekki sagt nei við Shakespeare,“ segir Högni. Töluverð tónlist verður í verkinu enda mun Íslenski dansflokkurinn taka virkan þátt í því. Högni sagðist ekki vera farinn að leggja drög að tónlistinni sjálfri en sagði verkið vera spennandi. „Þetta er mjög óræð saga með undarlegt sögusvið sem gefur mikið rými til túlkunar,“ útskýrir Högni.

Hjaltalín tekur ekki þátt í jólatónaflóðinu þetta árið með nýrri plötu en sveitin mun hins vegar koma fram á allnokkrum tónleikum, meðal annars í Hofi ásamt Sinfóníuhljómsveit Norðurlands. Þá er á dagskrá sveitarinnar tónleikaferð í desember þannig að tónskáldið Högni mun þurfa að halda nokkuð vel á spöðunum. „Maður verður að haga tíma sínum skynsamlega ef þetta á að hafast,“ segir Högni en auk þess er nú verið að leggja lokahönd á tónleikamynd sem koma á út á næstunni. Þar verður tónleikum Hjaltalín og Sinfóníuhljómsveitar Íslands gerð góð skil.

freyrgigja@frettabladid.is