Sleit símtali við Neyðarlínuna áður en beðið var um hjálp

Vaktstjóri KFC hringdi á Neyðarlínuna í gærkvöldi eftir að þrír starfsmenn brenndust við störf sín.

Einn slasaðist alvarlega og liggur á gjörgæsludeild. Samkvæmt upplýsingum frá Neyðarlínunni barst neyðarverði fyrirspurn frá vaktstjóranum þar sem hann spurði hvort það væri ekki réttast að fara með mennina upp á neyðarmóttöku vegna meiðsla þeirra.

Neyðarvörður svaraði því játandi en þá sleit vaktstjórinn símtalinu.

Einn piltanna sem brenndist ók með hina tvo upp á slysadeild þar sem gert var að sárum þeirra. Aftur á móti hafði lögreglan enga vitneskju um málið fyrr en rúmlega tólf á miðnætti, eða þremur tímum síðar.

Haft var eftir Helga Vilhjálmssyni, eiganda KFC, hér á Vísi að neyðarvörður hefði sagt vaktstjóranum að það væri best að hringja í leigubíl og senda mennina á slysadeild.

Dagný Halldórsdóttir, aðstoðarframkvæmdastjóri Neyðarlínunnar segist ekki kannast við það.

Hún segir innhringjandann hafa sagst vera með fyrirspurn um það hvort ekki væri best að fara á neyðarmóttökuna með brunasár af völdum heits vatns.

Neyðarvörðurinn tók undir það og símtalinu lauk. Þar af leiðandi var tilvikið ekki tilkynnt til lögreglu og sjúkrabíll því ekki sendur á vettvang.

Í tilkynningu frá Helga Vilhjálmssyni, eiganda KFC, kemur fram að ekki hafi verið fylgt starfsreglum KFC við þrif á pottinum. Hann reyndist fullur af vatni, auk þess sem hann var settur í gang og honum lokað.

Við það sauð vatnið og þegar starfsmaðurinn opnaði pottinn spýttist vatnið yfir starfsmennina.

Hér fyrir neðan má svo lesa tilkynningu frá Helga.