Félag stofnað af Jóni Gnarr tapaði í máli gegn ríkinu

Íslenska ríkið var sýknað í dag vegna skaðabótamáls sem kvikmyndafyrirtækið Puppenspiel Ísland ehf. höfðaði gegn ríkinu en því var hafnað um styrk af Kvikmyndasjóði Íslands árið 2003 og 2004.

Fyrirtækið var stofnað af Jóni Fjörni Thoroddsen og Jóni Gnarr, borgarstjóra Reykjavíkur, en félagið hugðist framleiða kvikmyndina „Maður leiksins" en fengu ekki styrk til þess. Áður framleiddur þeir kvikmyndina „Maður eins og ég".

Verjandi félagsins vildi meina að synjun Kvikmyndasjóðsins hefði verið ólögmæt. Meðal annars vegna þess að einn af ráðgjöfum sjóðsins, Valdís Óskarsdóttir, kvikmyndagerðakona, gaf mismunandi umsögn um myndina. Í fyrstu gagnrýndi hún ekki handrit myndarinnar en gerði það ári síðar.

Þá vilja forsvarmenn félagsins meina að þeim hafi verið lofaður styrkur og að öll skilyrði hefðu verið uppfyllt í umsóknarferlinu.

Þeir kærðu málið til menntamálaráðuneytisins árið 2005 og kröfðust þess að ákvörðun Kvikmynda­miðstöðvar Íslands að hafna því að veita þeim styrk til gerðar kvikmyndarinnar „Maður leiksins", yrði ógild. Menntamálaráðuneytið féllst ekki á það.

Í kjölfarið var kvartað til Umboðsmanns Alþingis sem úrskurðaði að fjölmargir annmarkar hefðu verið á málsmeðferð menntamála­ráðuneytisins.

Héraðsdómur Reykjavíkur komst hinsvegar að þeirri niðurstöðu að ríkið væri ekki skaðabótaskylt vegna málsins. Dómurinn féllst þó á að fjölmargir annmarkar hefðu verið á málinu en þeir væru ekki nægjanlegar til þess að ríkið bakaði sér skaðabótaskyldu.