Einn almannatengill á hvern fréttamann

Um einn almannatengill er á hvern fréttamann á Íslandi, en fréttamönnum hefur fækkað um þriðjung á nokkrum árum.

Þeir Þorbjörn Broddason, félagsfræðiprófessor, og Ragnar Karlsson, félagsfræðingur, telja að starfandi séu nokkurnveginn jafnmargir almannatenglar og blaða- eða fréttamenn á Íslandi um þessar mundir. Samkvæmt nýrri úttekt þeirra eru um 271 í hvorum hóp, en í sömu úttekt kemur fram að starfandi fréttamönnum hafi fækkað um rúman þriðjung síðan 2006.

Ragnar setur í samtali við fréttastofu fyrirvara um að þessar tölur séu aðeins nálgun við raunverulegan fjölda starfandi almannatengla og fréttamanna. Þær byggi á félagatali blaðamannafélagsins og póstlista almannatengslafélagsins, en lýsi þrátt fyrir það vægi almannatengslaþjónustu í upplýsingaflæði.

„Ef við gefum okkur það að þessar tölur séu nærri réttu lagi, þá segir þetta okkur að það er aukin ásókn þrýstihópa, fyrirtækja og stofnana að ýta að fréttamönnum tilbúinni umfjöllun um mál og málefni á sama tíma og það kreppir að hjá fjölmiðlum," segir Ragnar.

Ragnar segir að eftir því sem meira kreppi að fjölmiðlum og fréttamennsku, þeim mun meiri líkur séu á því að þeir reiði sig á tilbúið efni frekar en sjálfstæða efnisöflun. Í rannsóknarskýrslu Alþingis kemur til dæmis fram að umfjöllun um fjármálafyrirtæki í aðdraganda hrunsins hafi að verulegu leyti mátt rekja til efnis frá fyrirtækjunum sjálfum. Í fjórum af hverjum fimm fréttum fjölmiðla um fjármálafyrirtækin hafi sjálfstæð efnisöflun og greinandi umfjöllun verið lítil eða engin.