Fjárhagsaðstoðin aukin í síðasta lagi um áramót

Fólki sem þiggur fjárhagsaðstoð frá Reykjavíkurborg hefur fjölgað um 25% á einu ári. Aðstoðin verður hækkuð um áramót en Þorleifur Gunnlaugsson varaborgarfulltrúi Vinstri grænna vill að aðstoðin verði hækkuð strax, það sé forgangsatriði að fólk eigi fyrir nauðþurftum.

Eftir að Besti flokkur og Samfylking tóku við stjórn borgarinnar var hafin vinna við að undirbúa hækkun fjárhagsaðstoðar til fólks sem ekki hefur önnur laun eða bætur sér til framfærslu.

Þessum hópi fólks hefur fjölgað mikið undanfarið, í júní í fyrra þáðu tæplega 1200 slíka aðstoð en í sumar voru þeir orðnir tæplega 1500. Vinstri grænir lögðu svo fram tillögu í Velferðarráði síðastliðinn fimmtudag um að hækka aðstoð til einstaklinga um 17 þúsund krónur - úr 125 þúsund í 142 þúsund krónur. Og aðstoð til sambýlisfólks um 22 þúsund krónur. Tillögunni var hafnað. Björk Vilhelmsdóttir Samfylkingu formaður velferðarráðs segir að

mikill vilji sé til að hækka fjárhagsstoð og að það viti Þorleifur Gunnlaugsson vel. Það verði gert í síðasta lagi um áramót, samhliða afgreiðslu fjárhagsáætlunar.

Það þarf lengri tíma til að undirbúa þessa hækkun, segir Björk - og segir borgina auk þess læsta inni í fjárhagsáætlun þessa árs.

Þorleifur Gunnlaugsson, borgarfulltrúi Vinstri grænna, er óssammála því að ekki sé hægt að hækka aðstoðina strax. Hann segir þetta spurningu um forgangsröðun - að hans mati sé það forgangsatriði að fólk fái lifað af launum sínum.

Borgin hafi verið að láta frá sér fé - sem ekki hafi verið inni á fjárhagsáætlun, svo sem 12 milljónir í hina nýju Bíó paradís í Regnboganum. Það myndi kosta borgina um 60 milljónir króna að hækka aðstoðina nú strax í stað þess að bíða til áramóta.