Vændu hvor annan um að vinna í þágu styrktaraðila

Þingmenn Sjálfstæðisflokks og Samfylkingar vændu hvorir aðra um að láta hagsmuni þeirra sem styrkja flokkana ráða málflutningi sínum á Alþingi í gær.

Magnús Orri Schram, Samfylkingu, sagði að ef til vill væri rétt að skoða tregðu Sjálfstæðisflokksins til að birta upplýsingar um styrki til flokksfélaga á landsbyggðinni í samhengi við andstöðu flokksins við skötuselslögin.

Þórunn Sveinbjarnardóttir, Samfylkingu, sagði að lög um fjármál stjórnmálaflokka væru fyrir kjósendur svo að þeir gætu metið málflutning flokka og þingmanna í ljósi þess hverjir styðja þá fjárhagslega. „Í Valhöll er trúnaðurinn enn mestur við þá sem létu framlög af hendi rakna," sagði hún.

Þorgerður Katrín Gunnarsdóttir, varaformaður Sjálfstæðisflokksins, sagði að fjáröflunin hefði á sínum tíma verið fyllilega í samræmi við lög. Styrkir hefðu farið úr böndum. Því hefðu sjálfstæðismenn skilað háum styrkjum frá FL Group og Landsbankanum. Hún spurði hvort Samfylkingin ætlaði ekki að skila styrkjum frá Baugi, FL Group og tengdum félögum.

Illugi Gunnarsson, Sjálfstæðisflokki, spurði hvort skýringarinnar á afstöðu Samfylkingarinnar til fjölmiðlafrumvarpsins á sínum tíma væri að leita í því hver var duglegastur við að styrkja Samfylkinguna á þeim tíma. „Það er verðugt rannsóknarefni," sagði Illugi. - pg