Borgartréð afhjúpað

Klukkan tvö í dag afhjúpaði Jón Gnarr borgarstjóri skilti við Borgartréð 2010 í Víkurgarðinum við Aðalstræti.

Borgartréð er Silfurreynir sem talinn er elsta tré borgarinnar, gróðursettur árið 1884 af Schierbeck landlækni. Tréð er því um 130 ára gamalt og 10.9 m á hæð og er vel að titlinum komið.

Menningarnótt Reykjavíkur er nú haldin í fimmtánda sinn og er langfjölmennasta hátíð sem haldin er á landinu. Dagskráin hefur gengið vel það sem af er degi, og að sögn lögreglu hefur verið jafn straumur fólks í miðborgina og fer fjölgandi eftir því sem líður á daginn.

Í boði eru rúmlega 400 viðburðir af öllum stærðum og gerðum um alla borg.

Boðið verður upp á veglega tónleika bæði á Arnarhóli og á Ingólfstorgi í kvöld og Menningarnótt lýkur svo með flugeldasýningu sem hefst klukkan 23.00.

Ástæða er til að minna á að margar götur miðborgarinnar eru lokaðar fyrir bílaumferð á meðan Menningarnótt stendur. Borgarbúum og gestum er bent á að ókeypis er hinsvegar í strætó á Menningarnótt.