Borgin styrkir sumarbúðirnar í Reykjadal áfram

Velferðarsvið Reykjavíkurborgar styrkir þá þjónustu sem Styrktarfélag lamaðra og fatlaðra veitir í Reykjadal um 2,5 milljónir króna á þessu ári og hafa framlög ekki verið lækkuð. Þetta kemur fram í tilkynningu frá velferðarsviði vegna frétta af fjárhagsstöðu sumarbúða í Reykjadal.

Búðirnar hafa verið starfræktar í rúm 40 ár en nú blasir við að þeim þurfi að loka vegna fjárskorts. Sumarbúðirnar í Reykjadal hafa það að markmiði að veita börnum og ungmennum sem þurfa sérstaka þjónustu vegna fötlunar tækifæri til að komast í sumarbúðir og vetradvöld líkt og ófatlaðir jafnaldrar þeirra. Vegna samdráttar blasir nú við að hætta þurfi starfinu í Reykjadal en um 15 milljónir þarf til að tryggja starfsemina áfram sem hingað til hefur verið fjármögnuð með fjármagni frá ráðuneytum og sveitarfélögum.

Fram kemur í tilkynningu frá velferðarsviði að fyrir tveimur árum hafi verið gerður þjónustusamningur við styrktarfélagið til þriggja ára. Á samningstímanum hafi borgin því samtals greitt 7,5 milljónir króna til sumardvalar fyrir 65 reykvísk börn og ungmenni og helgardvalar fyrir 70 reykvíska einstaklinga. Í tilkynningunni segir að markmiðið með samningnum sé að auka lífsgæði fatlaðra einstaklinga og fjölskyldna þeirra og áfram verði unnið að því sama markmiði.