Ganga 130 kílómetra svo að sumarbúðirnar loki ekki

Ég hlakka til þess að komast þangað allt árið. Svona svaraði drengur spurningu fréttamanns um hvernig honum þætti vistin í sumarbúðum sem Styrktarfélag lamaðra og fatlaðra rekur í Reykjadal fyrir börn. Búðirnar hafa verið starfræktar í rúm fjörtíu ár en nú blasir við að þeim þurfi að loka vegna fjárskorts.

Sumarbúðirnar í Reykjadal hafa það að markmiði að veita börnum og ungmennum sem þurfa sérstaka þjónustu vegna fötlunar tækifæri til að komast í sumarbúðir og vetradvöld líkt og ófatlaðir jafnaldrar þeirra.

Vegna samdráttar blasir nú við að hætta þurfi starfinu í Reykjadal en starfsmenn þar neita að sætta sig við þær málalyktir.

Þetta öfluga starfsfólk sem er hérna ætlar ekki að loka dyrunum hérna. Við ætlum að bregðast við þessu og koma af stað fjáröflun sem er nú í fullum gangi," segir Sólveig Hlín Sigurðardóttir, forstöðumaður Reykjadals. Fjáröflunin felst í því að starfsmenn Reykjadals munu safna áheitum og 17. ágúst munu þeir ganga með einhvern sitjandi í hjólastól frá Laugalandi í Holtum, sem eru einnig sumarbúðir fyrir fatlaða, til Reykjadals og þaðan að Styrktarfélagsins að Háaleitisbraut í Reykjavík. Vegalengdin er um 130 kílómetrar.

Starfmennirnir víla þá vegalengd ekki fyrir. Segja að mikið sé í húfi enda afþreying fyrir fötluð börn af mjög skornum skammti. Skaðinn sem hlytist af lokun búðanna væri því sérlega mikill.

Hægt er að styrkja sumarbúðirnar með því að leggja inn á reikning 549-26-10 og kennitalan er 630269-0249.

Hægt er að fara inn á Facebook-síðu átaksins hér