Skrifað undir samning um breikkun Suðurlandsvegar

Skrifað var í dag undir samning við verktakafyrirtækið Ingileif Jónsson ehf. um framkvæmdir við áfanga við breikkun Suðurlandsvegar. Áfanginn sem um ræðir er frá Lögbergsbrekku að Litlu kaffistofunni.

Á vef Vegagerðarinnar segir að undirbúningur þess að hefja framkvæmdir sé þegar farinn í gang og búast megi við að þess sjái merki á verkstað eftir 2-3 vikur.

Vegna kærumála hafðist verkið ekki á þeim tíma sem ætlað var en töfin mun hafa óveruleg áhrif á verklok. Reiknað er með að framkvæmdum við þennan kafla verði að mestu lokið haustið 2011.