Kraftakonur Kristínar

Myndlistarmaðurinn Kristín Gunnlaugsdóttir sýnir um þessar mundir í sal Íslenskrar grafíkur hafnarmegin í Hafnarhúsinu.

Kristín er þekkt fyrir falleg málverk sem bera sterkan keim af helgimyndum, enda listakonan lærð á því sviði. Það sem hún býður upp á nú er algjörlega frábrugðið fyrri verkum. Á sýningunni eru grófgerð veggteppi sem sýna konur á nærgöngulan og hreinskilinn hátt.

„Móðir og barn er þema sem ég hef meðal annars verið í undanfarin ár. Ég er enn að vinna með svipað myndefni en nálgast það inn um allt aðrar dyr. Þess vegna er vel við hæfi að sýningin er bakdyramegin í Hafnarhúsinu,“ segir Kristín. „Þessi sýning er mikil kúvending hjá mér þar sem ég var komin á enda í fágaðri blindgötu. Ég er að taka ákveðna áhættu með því að standa með frumorkunni í mér. Þetta er allt hluti af sköpunarferlinu en það hafa verið átök að standa með sjálfri sér.“

Kristín segir ýmislegt hafa valdið stefnubreytingunni, meðal annars ólgan í þjóðfélaginu. „Hún hjálpaði. Þörfin verður svo ríkjandi að koma með hlutina upp á yfirborðið og standa með sjálfum sér. Maður nýtir sér áskorunina. Þrátt fyrir allt er skurnin lítilsvirði. Ég hef getað selt verkin mín og lifað á þessu, sem er mikil heppni en það nægði ekki því það skapar þá hættu að maður festist í hjólförum. Svo má líka segja að ég hafi gengið gegnum hluti í einkalífinu sem ýtti þessu af stað. Ég er sama eðlis og íslenska þjóðarsálin að því leyti að vilja nýta mér áskorunina þegar það sem maður þekkir er hrunið. Rétt áður en maður er að gefast upp verður að prófa að breyta til. Ég gerði það og þá fyrst náði ég í skottið á sköpunargleðinni.“

Viðbrögð við veggteppum Kristínar hafa verið kröftug en jákvæð. „Fólk verður mjög hissa. Margar konur fá flisskast. Á opnunni var mikil gleði og léttleiki. Mörgum léttir en sumir verða reiðir eins og gengur þegar unnið er með tabú. Aðrir hafa nú séð annað eins.“

Sýningunni lýkur 28. febrúar. Sýningin er opin frá fimmtudegi til sunnudags, á milli kl. 14 - 18. .

drgunni@frettabladid.is