Útgerðarfélag stefnir íslenska ríkinu

Útgerðarfélagið Rammi hf. hefur stefnt íslenska ríkinu vegna þeirrar ákvörðunar Jóns Bjarnasonar sjávarútvegs- og landbúnaðarráðherra að gefa ekki út úthafsrækjukvóta á yfirstandandi fiskveiði. Málið var þingfest í Héraðsdómi Reykjavíkur fyrir helgi og fær flýtimeðferð.

Hafrannsóknastofnun lagði til að heildarafli í úthafsrækju yrði 7.000 tonn. Jón Bjarnason ákvað hins vegar með reglugerð um miðjan júlí að úthafsrækjuveiðar yrðu gefnar frjálsar á þessu fiskveiðári.

Greint er frá þessu á vef Ramma.

Landssamband íslenskra útvegsmanna og einstaka útgerðir mótmæltu þessari ákvörðun ráðherra harðlega og nú hefur Rammi hf. stefnt íslenska ríkinu vegna málsins. Rammi telur lögvarða hagsmuni fyrirtækisins ríka, enda hafi það aukið heimildir sínar í úthafsrækju umtalsvert á undanförnum árum. Rammi telur meðal annars að ákvörðun Jóns Bjarnasonar um að gefa ekki út kvóta í úthafsrækju brjóti í bága við meginreglur stjórnsýsluréttar og brjóti jafnframt gegn eignarréttarákvæði sjötugustu og annarrar greinar stjórnarskrárinnar.

Karl Axelsson er lögmaður Ramma í málinu og hann fagnar því að fengist hafi flýtimeðferð á málinu, enda sé brýnt að fá sem fyrst niðurstöðu í það. Karl segir að á meðan þetta ástand vari séu þær heimildir sem fyrirtækið hafi fjárfest í afar lítils virði. Þegar ofan á það bætist óvissa bæði um þetta fiskveiðiár og hugsanlega í framtíðinni sé þetta óþolandi ástand.

Fréttin á vef Ramma.