Frjálsi breytti gengistryggðum lánasamningi

Frjálsi fjárfestingabankinn breytti skilmálum á gengistryggðum lánasamningi hjá viðskiptavini sem ætlaði að nýta sér nýlegt úrræði bankans. Talsmaður neytenda varar fólk við að skrifa undir slíkar skilmálabreytingar.

Frjálsi fjárfestingabankinn var fyrstur af bönkunum til að bjóða viðskiptavinum með erlend íbúðalán að greiða fimm þúsund krónur af hverri milljón upphaflegs höfuðstóls lánsins, þar til Hæstiréttur sker endanlega úr um óvissuna sem ríkir um erlend lán.

Viðskiptavinur Frjálsa, sem ætlaði að nýta sér þetta úrræði hafði samband við fréttastofu í gær en honum brá í brún þegar hann sá skjölin sem hann átti að undirrita.

Upphaflega skrifaði hann undir myntkörfulán í íslenskum krónum. En í nýja skjalinu sem hann átti að undirrita í síðustu viku var upphafleg lánsfjárhæð hins vegar komin í erlenda mynt, japönsk yen og svissneska franka.

Gísli Tryggvason, talsmaður neytenda, segir að óþarfi sé að fara í skilmálabreytingar á lánum vegna þessa tímabundna úrræðis.

„Í öðru lagi finnst mér ankannalegt að vera að snúa þessu við þannig að lán sem er augljóslega gengistryggt og ólögmætt samkvæmt dómafordæmi Hæstaréttar að því sé breytt samkvæmt skilmálabreytingu í erlent lán sem er löglegt," segir Gísli.

Hann efast um að slík skilmálabreyting standist lagalega.

„Ég efast um að þetta standist, svona breyting, en samt vara ég fólk við að skrifa undir þetta án fyrirvara," segir Gísli.

Samkvæmt upplýsingum frá Frjálsa fjárfestingabankanum hefur umræddu eyðublaði nú verið breytt. Inn í nýja eyðublaðið er kominn fyrirvari um að skuldari fyrirgeri ekki betri rétti sínum við undirritun samkomulagsins. Ekki liggur fyrir hversu margir viðskiptavinir Frjálsa skrifuðu undir gamla eyðublaðið en það var við líði í um tvær vikur. Þá er ekki víst hvort það muni hafa nokkur áhrif á réttarstöðu fólks, þegar kemur að því að skera úr um lögmæti lánanna.