Pétur Blöndal í formanninn

Pétur H. Blöndal þingmaður Sjálfstæðisflokksins ætlar að bjóða sig fram til formanns í flokknum gegn sitjandi formanni Bjarna Benediktssyni og kynnir framboð sitt í upphafi annars dags landsfundar í dag í Laugardalshöll. Pétur segir að hann vilji að fólk hafi kost á því að kjósa milli fólks til forystuembætta í flokknum. Hann vilji að lýðræðið fái að njóta sín og hann sé ekki að bjóða sig fram gegn einum né neinum.

„Ég veit ekki hvort ég á möguleika á kjöri, ég er bara að bjóða mig fram," sagði Pétur í samtali við Vísi nú í morgun. Pétur segist aldrei áður hafa beðið fólk um að kjósa sig til embætta í flokknum. Hann segir að dálítil umræða hafi átt sér stað að undanförnu milli hans og fólks í flokknum um framboð hans.

Vísir greindi frá því í gær að Pétur útilokaði ekki formannsframboð, en aðspurður hvort hann hyggðist bjóða sig fram svaraði Pétur því til að hann ætlaði ekki að svara já eða nei, hann væri á móti já eða nei spurningum.

Pétur staðfesti framboð sitt því ekki fyrr en nú í morgun, rétt áður en framboðsræður hefjast, en þær byrja klukkan 9:15. Bjarni er ekki á mælendaskrá samkvæmt heimildum fréttastofu. Formannskosningin hefst klukkan 13:30 í dag, en að forminu til eru allir landsfundarfulltrúar í kjöri á fundinum.

Alls eiga um 1.380 fulltrúar seturétt á fundinum, en það var nokkuð fámennt í salnum í Laugardalshöll þegar Pétur staðfesti framboð sitt Búast má við að fjölga taki í salnum og verða líklegast flestir viðstaddir fundinn um það leyti sem kosningin fer fram.

Landsfundurinn sem nú fer fram er aukalandsfundur. Boðað var til hans fyrir um tveimur mánuðum til að kjósa nýjan varaformann eftir að Þorgerður Katrín Gunnarsdóttir sagði af sér varaformennsku, en að óbreyttu hefði næsti landsfundur verið haldinn í september 2011. Í apríl síðastliðnum sagði Bjarni Benediktsson að það að flýta fundinum gæfi flokksmönnum tækifæri til að veita kjörnum forystumönnum flokksins endurnýjað umboð eða kjósa nýtt fólk til þeirra starfa.

Þetta er annar landsfundurinn í röð þar sem tekist er á um formannssætið, en þar áður hafði ekki verið formannsslagur í flokknum í 18 ár. Þá bauð Kristján Þór Júlíusson, þingmaður Sjálfstæðisflokks, sig fram gegn Bjarna með skömmum fyrirvara, þó ekki jafnskömmum og Pétur, og beið lægri hlut með 40,4% atkvæða gegn 58%.

Kjör varaformanns fer fram klukkan 15 síðdegis, en þar eru tvær konur í framboði; þær Ólöf Nordal, alþingismaður og Lára Óskarsdóttir, íslenskukennari.